|
FAVCONNERIE DE IEAN FRANCHIERES, GRAND PRIEUR D'AQUITAINE, AVEC tous les autres autheurs qui se sont peu trouuer traictans de ce subiect. A PARIS, Chez la veufue ABEL L'ANGELIER, au premier pillier de la grand'Salle du Palais. M. D. C. XVIII. |
|
de |
|
GUILLAUME TARDIF (du Puy en Velay) Contre le haut mal, dit epilence, les signes, la cause, le remede & la contagion de celle maladie. CHAP. V. |
On esprouue le haut mal d'epilence en ceste maniere, quand l'oiseau chet soudainement, & gist par quelque temps comme mort, & cela luy vient souuent au matin, & au vespre. Il a les yeux clos, les paupieres enflees, l'haleine puante, & s'efforce d'esmutir. La cause de ceste maladie est, chaleur & fumee du foye, laquelle monte au cerueau, & le lie & trouble. Le remede est, purger l'oiseau, comme est escrit en la premiere partie de ce liure, au chapitre vingt & vniesme.De puger l'oiseau en tout temps. Tu luy donneras dedans peu de chair le gros de deux poix d'aureau alexandrine, puis apres fais poudre de lentilles rousses & prens limeure de fer bien menue, tant d'vn que d'autre, & lie tous les deux en miel, & en fais pillules du gros d'vn poix, desquelles deux ou trois feras avaller à l'oiseau. Apres tiens ton oiseau sur le poing au Soleil ou aupres du feu, iusques à ce qu'il ait esmuti vne fois ou deux, & ne soit pu, iusques apres midy, lors donne luy bon past, & petite gorge. Ou fais pillules de poudre de Gerapigre, auec ius d'aluyne, lesquelles donneras à l'oiseau en sa cure. On luy donne poudre de gomme Balsami & Castorei, auec ius de mentastre, autrement nommee herbe contre les puces, soit l'oiseau tenu de iour, en lieu obscur, & l'eau deuant luy, laquelle luy est necessaire, & de buict soit tenu à la fraicheur, & fais ainsi six ou huict iours. Ceste maladie est contagieuse, pource garde qu'autre ne luy touche.
|
Messire Arthelouche de Alonga, Seigneur de Maraueques, Conseiller & Chambellan du Roy de Sicille. |
Les signes d'Epilepsie és Oiseaux.
Ayant l'oiseau ceste maladie d'Epilepsie, il tiẽt la teste haute tant qu'elle touche les aisles, & bien souuent les espaules, & subitement se laisse cheoir en arriere à terre, & à reuers : & là se tourne & vire, par la grãd angoisse qu'il sent, & aucunesfois demeure comme mort. Laquelle infirmié les prent souuent le matin, & le soir apres qu'ils sont puz, & ont les palpebres des yeux enflés, comme s'ils eussent la pierre, ou qu'ils eussent le catarre : & quasi continuellement tiennent les yeux serrez, & leur halaine put fort. Et quand ils esmeutissent, ils s'espraignent fort, comme s'ils eussent la pierre, & ces signes sont plus ou moins, selõ que les oiseaux sont passiõnez, ne perdãns point le manger par ceste maladie.
Le premier iour, faictes vomir vostre oiseau, & l'autre apres faictes le esternuer. Et quand vous ne le fairez point esternuer ne vomir, donnez luy de aurea Alexandrina, enuiron la grosseur de deux pois chiches, à ieun, & quelque petit morceau de chair : & au soir donnez luy vne pillule de yera ex octo rebus, cum agarico, en la plume. Et ce deuez faire continuellement iusques à ce qu'il soit guery. Et quand il sera bien purgé par les purgations dessusdites, donnez luy vn cautere au milieu de la teste, ou derriere des yeux, qui profonde iusques à l'os. Et si par ce premier cautere ne guerist, donnez luy en vn autre, vn peu plus arriere vers la nuque. Cassian guerit vne epilepsie, cum yera pigra, cum succo absintij, & de ce fais pillules, & les donne en la plume, vne fois de l'vn, & autresfois de l'autre, iusques en fin de guerison. Et Moymon fauconnier Arabique luy donnoit vne pillule faite de gomma balsami, & castoreo, cum succo mentastri, & leur mettoit en la gorge vne pierre de castoreo, gros comme vne petite feue. Que s'il la reiette, luy soit retournée : & garde que la goutte de la teste ne descende.
