ORUS APOLLO DE AEGYPTE de la signification des notes Hieroglyphiques des Aegyptiens, C'est à dire des figures par lesquelles ils escripvoient leurs mysteres secretz, & les choses sainctes & divines. Nouvellement traduict de grec en francoys & imprime avec les figures à chacun chapitre. Avec Privilege. On les vend a Paris a la rue Saint Jacques à l'enseigne des deux Coches Par Jacques Kerver. 1543 |
|
Il est permis a Jacques Kerver Libraire juré en l'université de Paris faire imprimer & vendre ce présent livre & deffenses à tous aultres libraires de non imprimer ou faire imprimer ledict livre sur telle ou aultre quelconque copie jusques a six ans finis & acomplis à compter du jour & datte de ceste présente impression sur peine de confiscation desdictz livres & d'amende arbitraire faict le quinziesme jour d'Octobre mil cinq cens quarante & trois. I. Morin
Aux lecteurs françays. |
[5]. Comment ilz signifioient l'an ensuyvant. Ilz figuroient la quarte partie d'une espace de champ dict aruum qui contient cent coubdees car en leur langue ilz appellent l'an quart pource que ainsi qu'ilz dient d'un lever de l'estoille appellee par eulx Sothis à l'autre il y a distance de la quarte partie d'ung jour, & comme l'an du soleil soit de trois soixante cinq jours, & ung quart de jour : au bout de quatre ans se trouve ung jour superhabondant car quatre fois la quarte partie de jour faict ung jour entier. [6]. Quelle chose ilz signifioient par l'aigle. Quant ilz vouloient denoter dieu ou haulteur, ou depression & bassesse, ou excellence, ou sang, ou victoire, ou Mars & Venus. Ilz paignoient ung aigle signifiant Dieu pource que c'est ung oyseau qui fort multiplie & vit longuement ; aussi il semble y avoir quelque effigie & similitude du soleil pource que seul entre tous les autres oyseaulx l'aigle tient les yeulx fermes & ouvers contre les rais du soleil & a ceste cause les medecins aux remedes des yeulx usent de l'herbe de l'aigle qu'ilz appellent hieracea. Aucunes foys ilz paignoient le soleil en forme d'un aigle comme celuy par qui nous voyons elle denote haulteur pource que quant elle veult monter en haut elle ne prent point son chemin de coste & a travers comme les aultres mais volle droict & contremont. Bassesse pource qu'elle font & descend de mesmes tout droict sans tournoyer comme font tous aultres oyseaulx. Excellence pource que en beaulte & noblesse elle excede tous les aultres. Sang pource qu'elle ne boit jamais eau mais sang. Victoire pource que qu'elle vainct & surmonte tous oyseaulx & que se trouvant au combat si elle se sent & trouve foible elle se renverse & mect les piedz contremont & devers le ciel & se deffend de son ennemy lequel voyant qu'il ne peult faire le semblable se donne a fouyr. [7]. Comment ilz denotoient l'ame. Ils mettoient une aigle pour l'interprétation de son nom car les Egyptiens appellent l'aigle Baieth lequel divisé en deux signifie l'ame & le cueur, Bai l'ame & eth le cueur, les Egyptiens dient que le cueur est ce qui envyronne etenue louppe l'ame, parquoy ce mot signifie ame cordiale ou courageuse, aussi que l'aigle en ce qu'elle ne boit que sang est de la nature de l'ame qui en est nourrye. [1]. Comment & par quelles figures ilz signifioient l'aage & les ans du temps. Pour denoter & signifier l'aage & le cours du temps ilz figuroient le soleil & la lune pource qu'ilz font la reigle de compter & discerner le temps. Autrement ilz paignoient ung serpent appellé Basilisque couvrant sa cueue du reste de son cors lesquelz ilz paignoient d'or & le mectoient a l'entour de leurs dieux, & la cause pour quoy il signifie le temps est pource que des troys especes de serpens cestuy est immortel & de son seul air & halaine estainct & fait mourir toutes aultres bestes. Et pour autant qu'il peut tuer les autres & non mourir, le mectent ilz sur la teste des dieux. [2]. Comment ilz signifioient le monde. Il paignoient ung serpent mengeant sa cueue diversifiée de plusieurs escailles qui représentent les estoilles ; c'est une beste pesante comme la terre, coulant comme l'eau & qui chacun an despoille sa vieilesse avec sa peau ainsi que le temps qui chascun an se renouvelle & semble rajeunir. Et pource que luy mesmes se devore veullent signifier que toutes choses produictes par le monde sont par luy consumées. [3]. Comment ilz signifioient l'an. Ilz paignoient la desse Isis & y a une estoille que les Egyptiens appelloient Isis, Et en leur langue Sothis, en grec astromyon, laquelle semble dominer & avoir seigneurie sur les estoilles & appert aucunes foys peu luysant, aultres foys plus clere, au lever d'icelle on a coutume de prevoir & congnoistre les choses à venir de l'année ensuyvant. Parquoy non sans raison ilz nommèrent l'an Isis. Autrement voullans denoter l'an ilz paignoient ung arbre de palme pource que contre la nature des aultres arbres à chascune lune nouvelle il produict ung rameau tellement que en douze lunes qui font l'an il a produit douze rameaulx. [4]. Comment ilz signifioient les moys. Pour denoter les moys ilz paignoient ung rameau pour la cause dessus dicte de la palme, ou la lune renversée pource qu'ilz dient que incontinent après le renouvellement de la lune il s'en faut quinze parties qu'elle ne nous appere formée ayant les cornes contremont. Quant elle est en conjonction, lors que nous disons qu'il n'est point de lune à son trentiesme jour, elle a les cornes tournées contre bas. [8]. Comment ilz signifioient Mars & Venus. Ilz paignoient deux aigles, l'une masle comparée à Mars, l'aultre femelle comparée à Vénus, pource que les aultres bestes ne veullent obeir à toutes les voluntés du masle, mais l'aigle est au contraire car toutes les foys qu'elle oyt le masle elle vient à luy jusqu'à trente foys le jour & davantage, parquoy toute femme obeyssant à son mary estoit par les egyptiens appellée Venus & pour autant avoient-ilz dédié l'aigle au soleil, pource qu'elle se joinct trente foys le jour au masle. Autrement ilz denotoient Mars & Venus par deux corneilles masle & femelle pource qu'elles ne pondent que deux œufs à la foys, adonc y a masle & femelle, & s'il advient qui est peu souvent que ce soient deux masles ou deux femelles, ne parient jamais entre les autres corneilles maiz vivent séparées jusqu'à la mort, & demeurent seulles, dont ceulx qui rencontroient une seule corneille le tenoit pour présage & signe de vesvaige, & encore jusques aujourd'huy les grecz, pour la merveilleuse concorde qui est entre les corneilles, en leurs festes nuptiales en font mention des corneilles. [9]. Comment il denotent les nopces. Quant ilz voulloient signifier les nopces ilz paignoient deux corneilles pour la cause qui dessus est dict. [10]. Comment ilz signifioient un enfant seul & unicque. Voulans signifierl'enfant unicque ou generation ou le pere ou le monde ou l'homme ilz paignoient ung escarbot qui est une petite beste suyvant les fiens des chevaulx & le roullant par petites boules. Premierement il signifie le filz unicque pource que ceste beste est, engendre de soy mesmes sans femelle ainsi qu'il s'ensuyt. Quant le masle veult procreer ses petis il cherche la fiente d'ung beuf & en faict une petite pelote ronde laquelle il roule avec le dos d'orient en occident & a tousjours le devant tourné devers orient jusqu'à ce qu'elle soit ronde à la forme du ciel, car le soleil est porte d'orient en occident & retourne en orient, mais par son propre mouvement contrairement à l'autre, il est porté d'occident en orient. Après l'escarbot enterre ladicte pellote & la laisse vingt huict jours entiers pource que en autant d'espace la lune passe par tous les douze signes & donne perfection aux bestes, le vingtneufiesme jour il tire sa pellote & la jecte dedans l'eau, pour autant qu'il pense que ce jour se face la conjonction de la lune au soleil & la generation des choses du monde, après il l'ouvre dedans l'eau & d'icelle sortent les petits escarbotz. Il signifie generation pour la mesme raison. Et le pere pource qu'il est procree du seul pere sans mere. Le monde pource qu'il a conformite de procreation & generation avec le monde. L'homme pource qu'en ceste espece ne se trouve point de femelle. Et y a trois manieres ou especes de scarbotz, la premiere qu'ilz appellent feliforme ou forme de chat & luysant, laquelle pour la similitude ilz dedient au soleil, car on dict qu'ung chat masle diversifie les prunelles de ses yeulx selon les cours du soleil, le matin au lever du soleil elles sont longuettes, environ midy toutes rondes, vers le soir obscures. Et en la ville du soleil la figure d'icelluy soleil y est formee en figure d'un chat, le scarbot a trente doigt pour les trente jours du mois esquelz le soleil fait son cours, par un signe la seconde espece a deux cornes & forme de taureau & est dedie à la lune par quoy les Egyptiens estiment le Taureau celeste estre l'acendant de la lune, la troysiesme espece n'a que une seulle corne de sa propre & commune forme dedie à Mercure ainsi que la Cicogne. [11]. Quelle chose ilz signifient par le voultour. Quant ilz vouloient denoter une mere ou la veue ou le bout ou la borne & limite ou la prescience ou l'an ou urania, c'est à dire la deesse celeste ou misericorde ou la desse Pallas ou la deesse Juno ou deux drachmes, ils paignoient ung voultour ; la mere pource que en ceste espece d'oyseaulx ne s'y trouve point de masle & sont engendres en ceste maniere. Quant le voultour veult concepvoir il tourne le derriere vers la bise & demoure ainsi par cinq jours durant lesquelz il ne boit ni ne menge, en telle forme s'emplit & concoipt ; il y a d'autres genres de voultours qui ne concoipvent point au vent, mais leurs oeufz sont inutiles à geniture, seulement bon à menger. La veue pource qu'il a la veue plus aigue que nulz aultres oyseaulx, car au matin sur le soleil levant il regarde devers occident & sur le soleil couchant devers orient, par ainsi apperçoit il de tresloing sa proye. Le limite pource qu'il assigne & limite le lieu aux batailles & y appert & previent sept jours au paravant. Prescience pour la mesme raison. Et pource qu'il tourne sa veue devers l'endroit & la partie qui doibt avoir du pire & estre defaicte comme s'il faisoit provision & assignant pour le temps advenir son past & nourriture. Parquoy les anciens roys souloient envoyer gens expres pour veoir & considérer de quel coste les voutours avoient les testes tournees ; l'an pource que cest oyseau divise les troys cens soixante & cinq jours desquelz l'an est parfaict & acomply, ainsi qu'il s'ensuyt il demeure cent & vingt jours sur la terre sans s'eslever, gardant ses petitz & les nourrissant deux cens & cinquante jours, il entend a soy mesmes sans pondre ne nourrir seullement s'apprestant à concepvoir, les cinq autres jours qui restent il consume en concepvant ; misericorde par adventure par son contraire, pource que cest oyseau n'a partie de nulle autre beste ou pource que durant les cent & vingt jours qu'il nourrit ses petitz, il ne volle point & s'il advient que nourriture luy defaille pour leur donner, il se entame la cuisse & leur donne le sang. Pallas & Juno pource que les Egyptiens estiment la haulte partie du ciel esr attribuee à Pallas & le dessoubz à Junon, par quoy il treuvent chose mal propice & convenable d'appeler le ciel par ung nom masculin, entendu que la generation du soleil, de la lune & des aultres estoilles se parfaict par operation feminine. Et l'espece des Vaultours est seulement de femelles, pour laquelle cause il font ledict Voultour roy sur tous les autres oyseaulx de ce sexe. Par lequel ilz signifient pour le faire brief, toutes les aultres deesses. Par luy aussi ilz denotent la mere, cer estre mere appartient au feminin ; pareillement deux dragmes pource que les Egyptiens notent deux dragmes par unite & unite est le commencement de tout nombre, doncques non sans cause par le Voultours ilz signifioient deux dragmes, attendu que mere & commencement sont quasi comme une unite. [12]. Comment ilz paignoient Vulcanus. Pour donner à entendre Vulcanus ilz paignoient ung escarbot. Et ung voultour pour Minerve par lesquelz seulz ils pensent le monde estre maintenu sans qu'il soit besoing y avoir des masles ; par le voultour signifians Mynerve à cause que ces deux dieux seulz entre tous les aultres sont chacun en son endroict masle & femelle. [13]. Quelle chose ilz signifioient par l'estoille. Par l'estoille ilz signifioient dieu ou la destinee ou le cinquieme nombre. Dieu pource que la divine providence donne & decerne la victoire par laquelle le mouvement des estoilles & de l'universel monde est parfaict, car sans dieu ny a chose qui puisse consister ny demourer en estre ; la destinee pource quelle est causee & depend du mouvement & dispensation des estoilles. Le nombre cinq pource que combien que au ciel soient plusieurs estoilles, en cinq tant seullement dicelles consiste les dispensations de tout le monde. [14]. Ce qu'ilz signifient par le Cinocephale ou teste de chien. Quant ilz veullent signifier la lune ou la rotundite & revolution de la terre, les lettres ou les prebstres, ou Ire ou le nager, ilz paignoient le Cinocephale. La lune pource souffre diverses affections selon le cours de la lune. Car quant elle est en conjunction avec le soleil ; le masle Cinocephale ne veoit ne mange, mais les yeulx tournez jectez en terre comme s'il lamentast le ravissement de la lune ; la fumelle oultre qu'elle ne veoit & souffre tout ainsi que le masle, elle rend le sang par la nature. Parquoy es lieux sainctz & on est l'administration des choses divines, on les nourrit à ce jourd'huy des cinocephales, à celle fin que par eulx soit entendue la conjonction de la lune & du soleil. La rotundite de la terre pource qu'ilz dient que au monde y a septante & deux climatz ou contrees & comme soient curiosement nourriz & traitez es temples ilz ne meurent point tout à un jour & a une foys comme les aultres animaulx mais chascun jour meurt une partie d'eulx & est ensepvelie par les prebstres le demourant du corps demourant en son entier estat & nature & ainsi ensuyvant continuent à mourir par parties jusques au septante deuxiesme jour quand tout est mort. Les lettres pource que les cinocephales naissent avec certaines figures parquoy quant premierement le cinocephale est amene dedens le temple le prebstre luy met au devant ung tableau ou papier une plume & l'encre pour experimenter s'il est de l'espece & race d'iceulx qui ayment les letres & s'il les sçait, car Mercure a aprins les letres à ceste maniere de bestes, il denote aussi le prebstre pource que de sa nature le cinocephale ne menge point de poysson, toutesfois n'est point inutile ne fetard comme sont les prebstres estrangiers, oultre il naift circunciz & les prebstres sont & prouvent la circoncision ; ire pource que ceste beste est ireuse & cholere plus que toutes les autres. Le nager pource que les aultres animaux hantent & frequentans souvent les eaulx accueillent de l'ordure, mais le cinocephale pour nager qu'il face n'en est jamais souille ny plus ort. [14]. Comment ilz signifioient la nouvelle lune. S'ilz vouloient signifier la lune nouvelle, ilz paignoient derechief le cinocephale estant en ceste maniere ayant les piedz de devant levez vers le ciel & en sa teste le signe royal, car ilz disoient que le cinocephale se mect en ceste sorte quant la nouvelle lune apparoist comme s'il rend graces à dieu de ce que la lune separee du soleil ait reprins sa clarte sans empescher celle du soleil. [16]. Comment ilz signifioient les deux temps equinoctiaux c'est à dire quant les jours & les moys sont egaux. Quant ilz voulloient denoter les temps equinoctiaux qui adviennent deux foys l'an ilz paignoient le Cinocephale assiz pource que celle beste esdictz temps equinoctiaux pisse douze foys le jour & autant la nuict à chascune heure. Parquoy non sans raison les Egyptiens formerent celle figure en leurs horloges d'eau & faisoient que l'eau tomboit par le membre d'icelle à cause que, comme dict est par son pisser douze foys le jour, il semble denoter & mesurer les heures & affin que l'eau n'en yssiist plus habondamment qu'il n'estoit besoing ou qu'elle ne feust retenue & ne peust couler, parquoy les heures n'eussent peu avoir leur espace necessaire, ilz prenoient le bout de sa queue & le peloient, puis faisoient ung tuyau de fer semblable grosseur & ont este meuz de ce faire par bonne raison, ainsi que les aultres choses & aussi pource que le cinocephale seul entre les aultres bestes es jours equinoctiaux abaye douze foys le jour. [17]. Comment ilz signifioient le courage. Voullans signifier le courage paignent le lyon, ceste beste a la teste grande et les prunelles des yeulx ardans, le museau rond & les poilz en façon de raiz à la semblance du soleil, parquoy soubz le throsne dudict soleil ilz paignoient le lyon demonstrans par ce sa forme estre faicte en la figure de dieu, c'est à dire du soleil, lequel est appelle par les grecz oros, car il a domination sur les heures. [18]. Comment ilz denotoient force. Pour signifier force ilz paignoient le devant d'un lyon pource qu'il a les membres de devant plus fors que les autres. [19]. Comment ilz signifioient l'homme veillant. Quant ilz voulloient demonstrer ung homme veillant ou de bon guet ilz paignoient la teste du lyon pource que le lyon quant il veille a les yeulx cloz, quant ilz dort il les a ouvers, qui ezt signe de vigilance, parquoy non sans cause ilz mectoient les lyons comme gardes es temples & cloistres des dieux. [20]. Comment ilz signifioient l'homme paoureux. Signifians l'homme craintif paoureux ilz usoient de celle mesme figure pource que estant le lyon le plus fort de toutes les aultres bestes, ilz espovente toutes celles qui le rencontrent. [21]. Comment ilz signifioient le Nil croissant & sortant de ses Rives. Quant ilz vouloient signifie le Nil deborde, lequel est appelle par eulx Num & par les grecz Neon, qui signifie naguyere ou nouvellement ou neuf, aucunes foys ilz paignoient ung lyon, aucunes foys troys cruches, aucune foys le ciel & la terre produisant habondance d'eau. Le lyon pource que quant le soleil entre au signe de lyon & tant qu'il y demeure, il esment grandement inundations & bien souvent au double de ce qu'il souloit, parquoy es tuyaulx & conduictz des fontaines dedies pour les temples, on les veoit en forme de lyons & encores aujourd'huy ceulx qui ont charge de service divin font prieres pour la trop grande inundation & habondance des eaux. Les troys ydries ou cruches & le ciel & la terre aussi signifient sources d'eaux & comparent le Nil à ung cueur ayant langue, car les Egyptiens estimoient le cueur estre la premiere & principale partie, comme ilz tenoient ledicte Riviere de Nil est chef & le prince d'Egypte & le font semblable à la langue, pource que la langue est tousjours en lieu humide, oultre ilz l'appellent mere. Les troys cruches moins ne plus pource qu'ilz donnent & enseignent troys raisons du debordement & derivage du Nil, la premiere la terre de Egypte qui d'elle mesmes produict l'eau, l'atre la mer oceane qui reflote en Egypte, la tierce les pluyes lesquelles en celle saison sont grandes es parties du midy & devers le pays de Ethiopie. Que le pays de Egypte produise eau se peult comprendre par ce que es aultres climatz les inundations se font en hyver, pour les grandes & continuelles pluyes. Mais le pays de Egypte situe au milieu de la terre ainsi que la prunelle en l'œil en este est humide du Nil. [22]. Comment ilz escripvoient Egypte. Pour escripre Egypte ilz mectoient ung encencier ardant & pardessus ung cueur, voulans dire que comme le cueur d'un Jaloux est ars, ainsi Egypte pour la challeur qui y regne produict & engendre continuellement des bestes & animaulx. [23]. Comment ilz signifioient ung homme qui n'a gueres voyage. Pour denoter ung homme qui ne va guyeres loing ilz paignoient la teste d'ung asne pource qu'il n'oit point les histoires & n'a cognoisssance de ceulx qui ont voyage. [24]. Comment ilz signifioient prtotection ou defense ou ung charme defensif & preservant. Quant ilz vouloient signifier toute defense, seurete & preservation, ils paignoient deux testes, l'une d'homme regardant par dedans & l'autre de femme regardant par dehors, ilz dient que en ceste maniere le mauvais esperit n'a puissance d'assaillir aucun, pource que sans letres ilz se gardent par deux testes. [25]. Comment ilz denotoient ung homme imparfaict ou embrion. Voulans signifier ung homme imparfaict ilz paignoient une Grenoille, pource que la Grenoille est engendree & produicte en lymon de la riviere, & veoit on souvent des Grenoilles imparfaictes, l'une moictie formee & vive & l'autre moytie encore boue & limon, ainsi que l'eau luy a failly. [27]. Comment ilz signifioient Oraison, ou harengue ou le parler. Quant ilz vouloient denoter oraison ou harengue, ilz paignoient une langue & ung œil sanglant, assignans le premier office de parler à la langue & le second aux yeulx ainsi parfaictement consiste le parler de l'ame quant il est conforme & accomode aux mouvements d'icelle, ainsi est il appelle des Egyptiens l'autre parolle. Aultrement pour signifier oraison ilz mectoient une langue & dessoubz une main attribuans le premier office de parler à la langue & le second à la main, comme celle qui execute & donne perfection à ce que la langue veult dire. [28]. Comment ilz escripvoient le taire ou silence. Pour la signification du taire & silence ilz escripvoient le nombre de M.LXXXXV. abrege qui est le nombre de troys ans, a compter troys cens soixante cinq jours pour chascun an, voulans entendre que de ce temps de troys ans l'enfant ne parle point & combien qu'il ait la langue, si n'en a il pas l'usaige. [26]. Comment ilz signifioient une chose ouverte & patente. S'ilz voulloient escripre une chose manifeste ouverte & patente, ilz figuroient ung lievre, pource qu'il a tousjours les yeulx ouvers. [29]. Comment ilz signifioient la voix loingtaine. Voullans signifie voix eslongnee que les Egyptiens appellent ohe, ilz paignent la voix de l'air qui est le tonnerre, pource qu'il n'est chose qui si hault sonne ne qui tel bruit face. [32]. Comment ilz signifioient Volupte. Pour denoter volupte ou delectation, ilz escripvoient le nombre de xvj abrege pource que en l'aage de seize ans les hommes commencent à estre puissant & ydoines à generation. [33]. Comment ilz signifioient copulation charnelle. Quant ilz voulloient escripre l'assemblee de l'homme & de la femme, ilz mectoient deux foys le nombre de seize abrege, pource que les enfans sont engendrez par delectation & en la copulation charnelle y a double delectation de l'homme & la femme, parquoy ilz doubloient ledict nombre de xvj. [30]. Comment ilz signifioient l'ancien lignaige. Pour signifier l'ancien lignage ilz paignoient une liasse de papiers signifians par ce la premiere nourriture, car on ne trouva oncques le commencement de menger ny de generation. [31]. Comment ilz escripvoient le goust. Pour signifier le goust ilz paignoient le commencement de la bouche, pource que le goust s'estend jusques là, j'entens le goust parfaict, car pour signifier le goust imparfaict ilz paignoient la langue entre les dens, pource que par eulx tout le goust est acomply. [34]. Comment ilz signifioient l'ame longuement demourant en vie. Voulant signifier l'ame demourant longuement en estat ou inundation ilz paignoient un oyseau appelle phenix. L'ame, pource que le phenix est de treslongue vie & plus que toutes les aultres bestes qui sont au monde ; inundation pource que le phenix est le signe du soleil qui est la plus grant chose qui soit au monde, il monte devers tous & tout, cherche parquoy il a este appelle Polys, c'est à dire moult ou beaucoup. [35]. Comment ilz signifioient celuy qui retourne tard de son voyage. Quant ilz veullent escripre celluy qui retourne tard de son voiage, ilz paignent encore le phenix lequel revient en Egypte quant il a cinq cens ans d'aage, alors qu'il est prochain de sa fin. Et s'il advient que avant ledict temps ledict phenix soit trouve en Egypte, il est traicte avec grans mysteres. Tout ce que les Egyptiens ont accoustume de attribuer aux sainctz oyseaulx c'est à dire qui ont quelque conformite aux choses divines, ilz l'attribuent aussi au phenix, lequel sur tous aultres oyseaulx se resjoyt du soleil, mesmement en Egypte où la chaleur d'icelluy est grande, parlaquelle le Nil vient à croistre & deriver comme nous avons plus amplement cy dessus declaire. [36]. Comment ilz escripvoient le cueur. Quant ilz vouloient signifier le cueur ilz paignent la cicogne, pource que cest oyseau est dedie à Mercure seigneur du cueur & de la raison. Aussi que la cicogne a le cueur plus grand à sa proportion que le reste du corps & est ledict oyseau fort cogneu & mentione des Egyptiens. [37]. Comment ilz signifioient science & doctrine. Pour signifier science & doctrine ilz paignoient le ciel jectant la rosee, pource que la rosee tumbant sur toutes plantes amollit & attendrit celles qui de leur nature sont disposees à estre tendres & non point les autres qui par nature sont dures. Ainsi la science se présente à tous les hommes, les ingenieux & qui ont la nature bonne, la comprennent & retiennent ce que ne peuvent faire les gros entendemens & rudes esperitz. [38]. Comment ilz signifioient les letres Egyptiaques. Pour demonstrer les letres Egyptiaques ilz paignoient l'escripvain des sainctes letres ou un point & ligne ou note qu'ilz prennent pour la fin ou extremite, ou ung crible ou ung jonc, pource que toutes les escriptures des egyptiens sont parfaictes par ces choses, car ilz escripvent des Joncs & non d'autre chose ; ils paignoient le crible pource que c'est le premier instrument à faire le pain & est faict de jonc, voullans demonstrer par ce que celluy qui a de quoy vivre apprendra les letres, qui en a faute entend à aultre art & metier, parquoy ilz appellent la science Sbo qui se peut traduyre plain de viande ou nourriture ; ilz paignent le prebstre ou l'escripvain des choses sainctes pource qu'il donnoit jugement sur la mort & sur la vie les prebstres avoient ung livre qu'ilz appeloient la saincte Ambris, parlequel il jugeoient si le malade gueriroit ou non, ce qu'ilz designoient par la maniere du coucher de celuy qui estoit malade. Quant ilz paignoient la fin ilz entendoient que celluy qui avoit aprins les letres estoit parvenu en repos & au paisible estat de sa vie, delivre de toutes les calamites & erreurs de la vie humaine. [39]. Comment ilz signifioient le sainct escripvain ou celluy qui escripvoit les choses sainctes. Quant ilz voulloient signifier le sainct escripvain ou ung prophete ou celluy qui enterre les trepassez ou la Rate ou le sentement ou le Ris ou l'esternuer ou le prince ou le Juge, ilz paignoient ung chien. Le sainct escripvain pource que celluy qui veult estre parfaict escripvain doibt penser continuellement à abayer à ung chascun estre estrange & Rustique & ne faire plaisir à personne, ainsi les chiens. Le prophete pource que le chien semble s'esmerveiller plus que toutes les aultres bestes & d'un regard ferme & droit regarde les statues & Images des dieux comme faict le prophete. Celluy qui ensepvelit pource qu'il veoit les statues des dieux nues comme elles sont faictes & taillees, lors quu'il les collocques en leurs respositoires. La Rate pource que le chien a la rate fort legiere, encores qu'il meure ou tumbe en rage parquoy ceulx qui pensent les chiens qui sont pres de mourir, le plus souvent viennent à estre malade de la rate, mesmement filz sentent la leine de la beste. Pareillement signifie le sentir, le rire & l'esternuer pource que ceulx qui sont travaillez du mal de la rate ne peuvent sentir ny rire ny esternuer. [40]. Comment ilz signifioient l'homme constitue en estat de gouverneur ou de juge. Les Egyptiens descripvans le gouverneur ou Juge paignoient derechef le chien & aupres de sa figure nue le manteau Royal. Car ainsi que le chien regarde ententivement les statues & images des dieux comme nous avons dict, ainsi les gouverneurs & Juges du temps jadis soloient veoir le Roy nud, parquoy ilz se attribuent le manteau Royal. [41]. Comment ilz voulloient signifier celluy qui porte le sainct Manteau ou la sacree chappe. Quant ilz voulloient signifier celluy qui porte le sainct manteau ou la chappe, ilz paignoient ung gardien de maison pource que celluy qui porte ledict manteau est songneux de le garder, ainsi que le gardien la maison. [42]. Comment ilz demonstroient celluy qui compte les heures & y prend garde, que les grecz appellent horoscope. Pour signifier ung horoscope, c'est à dire qui note & prent garde aux heures pour entendre l'estat des choses, ilz paignoient ung homme mengeant les heures, non pas que ung homme les puisse menger, qui est impossible, mais pource que les hommes apprestent leurs viandes & ce qu'ilz doivent menger à certaines heures. [43]. Comment ils enseignoient ignorance. Voullans escripre ignorance ilz paignoient l'eau & le feu pource que par ces deux elemens toutes choses sont purifiees. [44]. Comment ilz signifioient ung homme meschant ou hayne. Quant ilz voulloient demonstrer & escripre ung homme mauvais & inique ou hayne & malveillance ilz paignoient ung poysson, pource que l'usaige & le menger du poysson est prohibe & interdict en choses divines & aussi que le poysson destruict tout ce qu'il rencontre & se menge l'un l'autre. [45]. Comment ilz signifioient la bouche. Pour signifier la bouche ilz paignoient ung serpent pource que le serpent n'a force que en la bouche. [46]. Comment ilz signifioient ung homme fort vaillant & tempere. Pour denoter ung homme viril & atrempe ilz paignoient ung taureau de forte nature, pource que le toreau est de telle chaleur que sans se mouvoir il saillit la vache & engendre & s'il la saillit autrement que naturellement, il la blesse ; il est aussi atrempe, pource que quant la vache est preigne il ne faict compte de y retourner. [47]. Comment ilz signifioient l'ouyr. Quant ilz veuilloient denoter l'ouyr ilz paignoient l'oreille d'un Toreau, pource que quant la vache demande le toreau, qui ne luy dure que troys heures, elle brait & appelle le toreau & s'il ne vient promptement & sur l'heure sa chaleur passe jusques à ung aultre temps, mais cela n'advient point souvent à cause que le Toreau, combien qu'il soit loing, l'entend & accourt incontinent & est seul entre toutes les aultres bestes de ceste nature. [48]. Comment ilz signifioient le membre de l'homme qui engendre souvent. Quant ilz voulloient escripre le membre de l'homme qui engendre souvent ilz paignent ung bouc & non un toreau, car le toreau n'est puissant d'engendrer jusqu'à ce qu'il ait ung an acomply. Mais le bouc le septieme jour apres qu'il est ne assault la chevre & a semence, ce que ne faict nulle aultre beste. [49]. Comment ilz signifioient le peche ou impurite. Pour signifier le peche ilz paignoient une beste nommee Orige pource que quant la lune appert si ceste beste la regarde, elle jecte ung hurlement sans la louer ny benistre & le signe de ce est que lors avec le pied de devant elle remue la terre & y cache ses yeulx, comme si elle avoit deplaisir de veoir la lune, ce mesmes elle fait au lever du soleil. Parquoy les anciens roys quant leurs horloges leur annonçoient le lever du soleil montoient sur ceste beste par le milieu d'icelle comme le long & d'une reigle congnoissoient le vray point de la lune & du soleil & les prebstres de toutes oyseaulx ne mengent que de cestuy, pource qu'il semble avoir quelque inimitie envers ladicte desse & s'il trouve en lieu solitaire quelque fontaine, après qu'il en aura beu, il la troublera avec ses levres ou mouvera le lymon, ou jectera de la terre dedens avec les piedz pour gaster l'eau & la rendre inutile à boire aux aultres bestes, de si mauvaise & maligne nature est l'orige, ainsi que l'on dit ces choses fait elle indeuement contre raison, veu que la lune engendre & augmente tout ce qui est utile en ce monde. [50]. Comment ilz signifioient la fin ou dissolution des choses. Pour demonstrer la fin & consumption des choses ilz paignoient ung Rat ou une souriz, pource que ceste beste gaste & corromp tout ce que elle gouste & menge & le rend inutile, semblablement ils usent de ce signe pour signifier ung Jugement, pource que si la souriz se trouve entre plusieurs pains de diverses sortes, elle s'adresse au meilleur dont il semble que la soriz soit le Juge bolengiers, qui est le meilleur d'entre eulx. [51]. Comment ilz denotoient un homme exhonte & sans vergogne. Quant ilz voulloient signifier une chose sans honte ilz paignoient la mouche, pource que combien qu'elle soit souvent chassee d'un lieu neantmoins elle y retourne tousjours. [52]. Comment ilz escripvoient Notice ou cognoissance. Voullans escripre notice ou cognoissance, ilz paignoient une formiz, pource qu'elle se sçait seurement cacher & oultre la coustume des aultres bestes faict provision de vivres pour l'huy & n'oublie point son domicille mais y retourne sans forvoyer. [53]. Comment ilz signifioient le filz. Voullans escripre le filz ou l'enfant paignoient une beste appellee chenalope, pource qu'elle ayme fort ses petitz, car s'il advient qu'elle soit chassee & suyvie avec ses petits, le pere ou la mere se laisse prendre ; par cela ses petits peuvent eschapper & estre sauvez. Pour ceste cause il a semble aux Egyptiens de prendre ceste beste pour celle signification. [54]. Comment ilz signifioient ung homme imprudent & qui n'a le sens bon. Pour designer ung homme peu saige & qui a faulte de sens, ilz paignent le pelican, pource que combien qu'il puisse faire ses oeufz en lieu hault ainsi que les aultres oyseaulx, toutesfoys le faist au contraire, car il cave la terre & pond en une petite fosse, ce que cognoissans les oyselleurs assemblent autour de son nid de la fiente de beuf seiche puis y mettent & allument le feu, le pellican voyan la fumee descend & cuidant estaindre le feu avec ses elles, le alume du vent & brusle ses plumes, ainsi est il prins desdictz oyselleurs. A ceste cause, il n'est pas permis aux prestres menger de cest oyseau, pource que ainsi simplement il se mect en peril pour ses petitz. Toutesfoys plusieurs Egyptiens en mengent, disans qu'elle ne le faict point de ruse & de sens comme la chenalope, mais par amour & solicitude qu'elle a envers sesdictz petitz. [55]. Comment ilz escripvoient recoignoissance & l'homme qui n'est point ingrat. Pour signifier gratitude ou recoignoissance ilz paignoient l'oyseau appelle Cucuphe, pource que seul entre les bestes il rend les plaisir & le semblable de ce qu'il a receu à ses pere & mere, car quant il deviennent vieulx, il leur faict ung nid au mesme lieu où ilz l'ont nourry & leur arrache les plumes & les nourrit jusques à ce qu'elles leur soient revenues & qu'ilz puissent voller & chercher à menger, parquoy on a coustume de paindre ung Cucuphe sur les sceptres des roys. [56]. Comment ilz signifioient ung homme injuste & ingrat. Quant ilz veullent signifier ung homme injuste & ingrat ilz paignoient deux ungles d'un hippopotame, c'est à dire cheval de riviere telz qu'ilz sont au Nil, & sont lesdictz ungles tournees regardans contre bas, pource que quant l'hippopotame est creu il s'essaye avec son pere pour savoir lequel est le plus fort. Si son pere succumbe & soit foible, il luy donne lieu & le laisse puis va habiter avec sa mere. Mais si le pere resiste & le cuyde empescher, il le tue pource qu'il est devenu le plus fort, doncques les Egyptiens paignent deux ungles du cheval de riviere courbes & regardant en bas, à celle fin que quant les hommes voyent & congnoissent pour quelle raison ilz y sont mis ilz soient plus enclins de rendre & récompenser les biensfaictz qu'il ont receuz de leurs peres. [57]. Comment ilz signifioient en autre maniere ung ingrat envers ceulx qui luy ont faict bien. Quant ilz voulloient escripre ung ingrat & rebelle envers ceulx esquelz il est tenu & qui luy ont bienfaict ilz paignoient une columbe pource que le masle des columbes quant il se trouve fort chasse son pere, se couple & habite avec sa mere ; il semble aussi que cest oyseau soit pur & net pource que au temps de peste quand toute la region est infectee de cette contagion, tant ceulx qui ont vie que les lieux & choses insensibles, ceulx qui usent en leur menger des columbes sont exemptz de ce danger. A ceste cause en temps suspect & pestillencieux, on ne sert les Roys d'autre viande que des columbes & pareillement aux ministres des dieux qui leur servent en purite, aussi on dit que ceste beste n'a point de fiel. [58]. Comment ilz signifient chose impossible à faire. Pour escripre une chose impossible à faire ilz paignoient les piedz d'un homme cheminans sur l'eau & en aultre maniere le declairans ilz paignoient ung homme cheminant sans teste, qui sont deux choses impossibles, parquoy non sans cause elles sont applicquees pour la signification dessusdicte. [59]. Comment ilz signifioient ung mauvais Roy. Pour demonstrer ung Roy tresmauvais ilz paignoient ung serpent en rond à la figure du monde, ayant sa cueue dedens sa gorge & escripvoient le nom du Roy au millieu de ses pliz & circumvolution, voullans parce entendre que le Roy est le recteur & gouverneur du monde ; le serpent est par les Egyptiens appelle Mesi. [60]. Comment ilz signifioient ung Roy faisant bonne garde. Autrement pour signifier le Roy faisant bonne garde ilz paignoient ung serpent veillant & pour leur nom du Roy ils paignoient ung gardien, car il est gardien du monde, parquoy il est necessaire qu'il soit vigilant. [61]. Comment ilz escripvoient le Roy recteur & gouverneur du monde. Derechief pour declarer ung Roy recteur & gouverneur ou seigneur du monde, ilz paignoient le mesmes serpent & au milieu d'icelluy une grant maison & ce pour bonne cause, car la maison Royalle d'un Roy est le monde. [62]. Comment ilz signifioient le peuple obesissant au Roy. Pour demonstrer le peuple obeissant au Roy ilz paignoient une mouche à miel, pource que la mouche à miel entre toutes les aultres bestes à Roy, lequel est suivy & obey de toute la multitude des mouches ainsi que les hommes obeissent à leur Roy, signifians par le miel l'utilite qui vient du Roy & par l'eguillon la force d'icelluy, car le Roy doibt efte utile en pourvoiant à son peuple & le tenant en paix & fort pour le defendre de ses ennemys. [63]. Comment ilz signifioient ung Roy dominant une partie du monde. Voullans denoter le Roy qui ne domine point tout le monde maiz seullement une partie, ilz paignoient la moitie d'un serpent, demonstrans le Roy par ceste beste & pource qu'elle n'est que demye, entendent qu'il ne domine pas entierement. [64]. Comment ilz signifioient le Roy seigneur & victorieux de tous. Quant ilz voullent signifier le Roy seigneur & victorieux de tous, ilz paignoient le serpent entier & parfaict, pareillement par cela ilz entendoient l'esperit qui se dilate par le monde. [65]. Comment ilz signifioient ung foullon ou taincturier. Pour signifier ung foullon ilz paignoient deux piedz d'un homme en l'eau, ce qu'ilz denotent à la similitude de Mercure. [66]. Comment ilz signifioient un homme ravisseur ou ydoine engendrant ou furieux. S'il voulloient signifier ung homme ravissant ou fertile ou furieux, il paignoient le Crocodile pource que ceste beste multiplie grandement & est furieuse & si, en voullant ravir quelque chose, il en est empesche, il exerce son couroux & sa fureur contre luy mesmes. [67]. Comment ilz signifioient orient ou la naissance. Pour signifier orient il paignoient les deulx yeulx du Crocodile pource qu'ilz sont fort luysans & semblent yssir du profond du corps. [68]. Comment ilz signifioient Orient. Quant ilz voulloient escripre occident ilz paignoient ung Crocodile qui se courbe ou encline pource qu'il faict ses petitz estant baisse. [69]. Comment ilz declaroient les tenebres. Pour escripre les tenebres ilz paignoient la cueue d'un Crocodile pource qu'il ne tue point la beste qu'il chasse jusques à ce qu'il l'a batu & lassee de sa cueue, en laquelle est toute sa force & puissance ; plusieurs aultres signes a le Crocodile, mais ceulx icy souffiront pour ce livre. [70]. Comment ilz signifient les moys. S'ils veullent escripre le moys ilz paignoient la lune & dessoulz vingt & huit jours equinoctiaulx chascun jour de xxiiij heures & deux jours pour la conjonction quand la lune est aupres du soleil, qui sont le moys entier. Fin du premier volume. LE SECOND LIVRE DE ORUS APOLLO NILIAQUE OU EGYPTIEN de l'interpretation des hieroglyphes ou sainctes figures des Egyptiens. En ce second livre je te donneray vraye raison du demourant & adjouxteray premierement ce qui n'a aucunement este explicque ny declare es autres livres. [1]. Quelle chose ilz voulloient signifier quant ilz escripvoient une estoille. Quant les Egyptiens mettoient une estoille ilz signifioient aucunesfoys dieu, autresfoys la nuict, autresfoys le temps ou l'ame d'un homme masle. [3]. Que signifioient les deux piedz de l'homme joinctz & fermes. Les deux piedz pareilz & fermes signifioient le cours du soleil quant il commence à remonter en hyver. [4]. Que signifie le cueur de l'homme pendu au gosier. Le cueur de l'homme pendu au gosier signifie la bouche d'un homme de bien. [6]. Que c'est qu'ilz signifioient par le doigt. Le doigt signifie l'estomac de l'homme. [7]. Que signifie le membre de l'homme couvert & serre de la main. Le membre tenu & serre de la main signifie atrempance. [8]. Comment ilz signifioient maladie. La fleur appelle Anemone, c'est à dire pavot, signifie maladie. [9]. Comment ilz signifioient les entrailles de l'homme. Pour signifier les entrailles ou l'estat & composition de l'homme ilz paignoient l'espine ou l'oz du doz pource qu'aucuns ont opinion que la semence de l'homme passe par icelluy. [10]. Comment ilz denotoient seureté, fermeté ou perseverance. Ilz paignoient ung os de la caille pource que l'oz de la caille n'est pas facilement altere & blesse. [11]. Comment ilz signifioient concorde. Deux hommes en habit de dignite signifioient concorde. [12]. Comment ilz signifioient troubles. L'homme arme tirant fleiches signifioit troubles. [13]. Comment ilz signifioient Mesure. Le doigt de l'homme signifie mesure. [14]. Comment ilz escripvoient la femme fiancee, promise ou espousee. Pour signifier la femme espousee ou fiancee ilz paignoient le cercle du soleil avec une estoille my partie avec le soleil. [15]. Comment ilz signifioient le vent. Ilz paignoient ung sacre ou faulcon montant & tirant vers le soleil levant, ce signifie vent. Autrement le faulcon estandant les aelles en l'air denote vent. [16]. Comment ilz escripvoient le feu. La fumee montant en l'air signifie le feu. [17]. La signification de l'œuvre. Pour signifier l'œuvre ilz paignoient la corne d'une beste masle. [18]. Comment ilz signifioient peine ou vengeance. La corne d'une beste femelle signifie peine ou vengeance. [19]. Comment ilz signifioient un homme mauvaiz, meschans & pervers. Ung homme depuis le nombril figure avec une espee signifie mauvaitie. [20]. Comment ilz escripvoient l'heure. Ilz paignoient ung hippopotame, c'est à dire cheval de fleuve ou riviere pour signifier l'heure. [21]. Comment ilz signifioient long temps ou vivre longuement. Ilz paignoient le cerf à qui tous les ans les cornes repullulent & renouvellent. [22]. Comment ilz signifioient destournement. Un loup ou un chien destourne signifie destournement. [23]. Comment ilz descripvoient l'euvre faicte ou future. L'oreille paincte signifie l'ouvraige faict ou que l'on veult faire. [24]. Comment ilz signifioient meurtre ou sang. La mouche guespe du crocodile vollant signifie le sang nuysant d'icelluy ou occasion de meurtre. [25]. Comment ilz signifioient la mort. La cheveche ou chahuant signifie la mort pource que de nuict elle assault les nidz & les petitz des autres oyseaulx soubdainement & au depourveu, ainsi faict la mort qui nous surprent alors que nous ne pensons point en elle. [26]. Comment ilz signifioient amour. Les lacz ou lacetz que les tend pour prendre les oyseaulx ou aultres bestes signifioient amour. [27]. Comment ilz signifioient une chose tresancienne. Le contenu des livres & les fueillez ensemble iceulx livres cloz & scellez signifioient les choses tresanciennes. [28]. Comment ilz signifioient le siege ou l'oppugnation d'une ville. Ilz paignoient une eschelle appuye & encline. [29]. Comment ilz signifioient ung homme peu expert ou la nuict ou la deesse fatalle. Sept elemens ou lettres contenues en deux doigtz signifioient l'homme sans experience ou la nuict ou la deesse fatalle. [30]. Que signifie une ligne mise & faicte sur une autre. Une ligne droicte faicte sur une aultre en travers signifioit dix lignes plaines. [31]. Quelle chose ilz signifioient quant ilz paignoient l'arondelle. Quant ilz vouloient signifier ung grant patrimoine ou heritaige laisse par le pere à ses enfans, ilz paignoient l'arondelle pource que en faisant le nid de ses petitz elle se plonge en la fange où elle meurt. [32]. Que signifie la columbe noire. Voullans signifier une femme vesve ou son vesvage jusques à la mort ilz paignoient la columbe noire pource que apres la mort de son masle elle ne se mesle plus avec aultre. [33]. Ce qu'ilz signifioient par la beste appellee Ichneumon. Voullans signifier ung homme foible, debile & impotent & qui ne peut de luy mesmes s'aider, mais a besoing de l'aide d'autruy, ilz paignoient Ichneumon pource que quant ceste beste veoit le serpent qui est son ennemy elle ne l'assault pas incontinent mais en appelle d'autres de son espece pour luy ayder. [34]. Quelle chose ilz signifioient par l'herbe dicte Origan. Quant ilz vouloient signifier qu'il n'est point de formiz ilz paignoient l'origan pource que se partent du lieu où ceste herbe est semee. [35]. Ce qu'ilz signifioient par le crocodile & le scorpion. Quant ilz voulloient signifier ung ennemy assailly par l'autre ilz paignoient le Crocodile & le Scorpion pource que l'un tue l'autre & quant ilz voulloient signifier lequel a vaincu ilz paignent le Crocodile ou le Scorpion, s'il a vaincu tost ilz metoient le Crocodile, s'il a vaincu tard il metoient le Scorpion pource qu'il se meult lentement. [36]. Quelle chose ilz signifioient par la Mustele. Quant ilz voulloient signifier la femme faisant les œuvres d'homme ilz paignoient la mustelle pource que celle beste à la marque du masle en forme d'un petit os. [37]. Ce qu'ilz denotent par le porceau. Pour signifier ung homme pernicieux ilz paignoient ung porceau car il est de pernicieuse nature. [38]. Comment ilz signifioient ire immoderee. Quant ilz vouloient escripre Ire tant demesuree qu'elle donne & cause la fiebvre à celluy qui se courrouce, ilz paignoient ung lyon battant ses petitz lyonceaux de sa queue, le lyon paignoient ilz pour sa fureur & les petits lyonceaux pour ce que leurs oz hurtez l'un contre l'autre rendent feu. [39]. Comment ilz signifioient ung viel musicien. Quant ilz voulloient signifier ung viel musicien ilz paignoient ung cigne pource que c'est ung oyseau de telle nature que tant plus ilz vieillit tant mieulx il chante. [40]. Comment ilz signifioient ung homme assemble à sa femme. Voullans signifier l'homme assemble à la femme ilz paignoient deux corneilles pource quelles parient & se couplent comme l'homme s'assemble à la femme. [41]. Ce qu'ilz signifioient par l'escarbot ou canthare aveugle. Quant ilz voulloient escripre ung homme surprins des raiz ou challeur du soleil & sui en est mort, ilz paignoient le scarbot ou canthare aveugle, car ceste beste meurt aveuglee des raiz du soleil. [42]. Que c'est qu'il signifioient quant ilz paignoient une mulle. Pour signifier une femme seule ilz paignoient une mulle, est seule pource qu'elle a la matrice de travers. [43]. Comment ilz signifioient la femme qui enfante une fille. Pour signifier la femme qui ait enfante une fille ilz paignoient ung toreau regardant & tourne devers le couste gauche ou senestre. Mais s'ilz vouloient escripre que la femme est accouchee d'un enfant masle ilz paignoient le toreau regardant au coste droit, car si le toreau apres avoir sailly la vache se remect en terre du coste gauche cela est signe quel a engendre une femelle & au contraire s'il se remect du coste droict ce sera un masle. [44]. Quant ilz signifioient les guespes. Pour signifier les guespes ou grosses mouches ilz paignoient un cheval mort pource que de la charogne d'un cheval mort les guespes s'engendrent. [45]. Comment ilz signifioient une femme qui a avorte ou enfante devant le temps. Quant ilz voulloient signifier une femme accouchee devant son terme ilz paignoient une jument foullant au piedx le loup pource que si la Jument preigne frappe de son pied le loup elle avorte incontinent & pareillement si elle marche sur le pas du loup. [46]. Comment ilz paignoient ung homme qui se guerit soy mesmes, enseigne par les dieux. Voullans signifier l'homme qui par le conseil & enseignement des dieux se guerit luy mesmes ilz paignoient une pie tenant une fueillu de laurier en son bec, pource que la pie quant elle est malade elle apporte une fueille de laurier en son nid & guerit. [47]. Comment ilz signifioient plusieurs petites mouches bruyans que l'on appelle mouchailles ou cosins. Pour signifier les mouchailles bruyans ilz paignoient des vers de terre pource que deulx s'engendrent les mouchailles. [48]. Comment ilz signifioient l'homme qui de soy n'est colere mais est esmeu par autry. Quant ilz voulloient signifier l'homme qui de soy mesmes n'est colere mais est esmeu & incite par autre ilz paignoient la columbe ayant le ventre leve en hault pource qu'elle a le fiel en ces parties. [49]. Comment ilz signifioient l'homme habitant & demourant seurement en la cite. Pour signifier l'homme seurement demourant en la cite ilz paignoient une aigle portant une pierre pource que l'aigle va prendre une pierre en la mer ou en la terre & la porte en son nid pour l'asseurer & tenir ferme. [50]. Comment ilz signifioient l'homme debile & foible poursuivy par aultre. S'il veulent signifier l'homme foible & debile poursuivy par ung aultre plus puissant, ilz paignoient ung cheval & ung oyseau appelle Otide, pource que ledict oyseau s'envole incontinent qu'il veoit le cheval. [51]. Comment ilz signifioient l'homme recourant devers son propre protecteur & qui n'est point aide de luy. Voullant signifier l'homme refuyant à son protecteur & qui n'est point aide par luy, ilz paignoient le passereau & la cheveche, pource que le passereau fuyant l'oyseleur & se retirant à la cheveche & est travaille par elle. [52]. Comment ilz signifioient l'homme foible qui toutesfoys s'enfuict & eschappe, ou qui est foible & neantmoins est rebelle, temeraire & injurieux. Quant ilz voulloient signifier l'homme foible & qui neantmoins s'enfuyt & tasche d'eschapper, ilz paignoient la chauvesoriz pource que combien qu'elle soit sans plume, toutesfoys elle volle. [53]. Comment ilz signifioient une femme allaictant & bonne nourrice. Pour signifier une femme allaictant & bien nourissant ilz paignoient une tourterelle car elle seulle entre les volatiles a dens & mamelles. [54]. Comment ilz signifioient l'homme qui se delecte en dances & sons d'instrumens. S'ilz voulloient signifier l'homme qui prent plaisir aux dances & à son d'instrumens, ilz paignoient une tourterelle pource que cest oyseau se laisse prendre au son des instrumens & en regardant ceulx qui saultent & dancent. [55]. Comment ilz signifioient l'homme mystique, c'est à dire traictant & sachant les secretz & ceremonies des choses sainctes. Pour declarer & escripre l'homme mystique & ayant charge des ceremonies & choses sainctes ilz paignoient une Cigalle pource qu'elle ne rend pas le chant par la bouche, mais jectant ce son par ses espaulles rend une chanson. [56]. Comment ilz signifioient le Roy solitaire & qui ne pardonne point aux malfaicteurs. Quant ilz voulloient escripre ung Roy solitaire & qui ne pardonne point les malfaictz ilz paignoient l'aigle pource qu'elle faict son nid es lieux solitaires & devers & volle plus hault que les aultres oyseaux. [57]. Comment ilz signifioient la restauration annuelle & durable des choses. Pour signifier la restauration annuelle des choses ilz paignoient le phenix pource que quant le phenix naift toutes choses se renouvellent & naist en ceste maniere. Quand le temps de mourir est venu au phenix il se jecte de hault contre la terre si impetueusement qui se faict une playe & du sang qui en sort s'engendre ung autre phenix, lequel quant les plumes luy sont venues va avec son pere en la ville de Egypte appelle Heliopolis, où son dit pere au lever du soleil meurt ; apres sa mort le nouveau phenix retourne en son pays, est enterre par les prebstres de Egypte. [58]. Comment ilz signifioient l'enffant aymant son pere. Pour signifier l'enfant qui ayme son pere ilz mectoient la cigogne pource que apres qu'elle a este nourrie de ses pere & mere elle ne les habandonne point mais demeure avec eulx jusques à l'extreme viellesse & les sert & nourrit. [59]. Comment ilz signifioient la femme hayssant son mary. Voullans signifier la femme qui hayt son mary & cherche les moyens de le faire mourir en le flattant quand ilz sont en leur prive & secretz, ilz paignoient la coleuvre ou serpent appellee vipere pource que quant les viperes se meslent pour engendrer, le masle mect sa teste dedens la gorge de la femelle apres que ladicte femelle a conceu elle serre la teste du masle & le tue. [60]. Comment ilz signifioient les enfans espians leur mere pour luy nuyre. Quant ilz voulloient signifier les enfans qui espient leur mere pour la faire mourir ilz paignoient une coleuvre appellee vipere pource que elle ne produict pas ses petitz par le lieu naturel comme les aultres bestes, mais quant leur temps de naistre est venu, ilz rompent le ventre de leur mere & sortent. [61]. Comment ilz signifioient ung homme leudange d'accusations & opprime d'oultrages & pource languissant. Voulans signifier l'homme moleste d'accusations & oultraiges & pource languissant ilz paignoient ung serpent appelle Basilisque pource que de son seul siffler il occit les autres bestes qui luy approchent. [62]. Comment ilz signifioient ung homme brusle du feu. Pour signifier ung homme brusle du feu ilz paignoient une salemandre pource que chascune teste elle occit. [63]. Comment ilz signifioient ung homme aveugle. [64]. Comment ilz signifioient l'homme habitant hors de sa maison. [82]. Comment ilz signifioient la femme qui n'est accouchee que une foys. Fin de Orus Apollo. Autre adjouxtez par le traducteur. Que signifie la petite aiglete ou le poulet de l'aigle. Le poulet de l'aigle signifie celui qui engendre des masles, ou le cercle ou la semence de l'homme. Comment ilz signifioient la porte ou l'ouverture de la guerre. Pour escripre la porte de la bouche de la guerre ilz paignoient les deulx mains de l'homme l'une tenant une armeure l'autre un arc. Comment ilz signifioient la vie future ou le salut à venir. Pour signifier la vie future ou le salut à venir ilz figuroient deux lignes une en travers sur une autre perpendiculaire en forme de croix & de cela ne donnoient autre raison, fors que c'estoit une signification de divin mystere. Comment ilz signifioient les deux principales vertuz d'un Roy. Pour signifier les deux principales vertuz d'un Roy ilz paignoient ung sceptre & un œil au-dessus signifians par le sceptre noble & humaine domination & par l'œil que le prince doibt estre regardant & pourvoiant à son peuple. Comment ilz signifioient le Roy. Pour signifier le Roy ilz paignoient une mouche à miel pource que l'abeille ou mouche à miel a le doulx & l'amer, c'est à dire le miel & l'esguillon, ainsi ung Roy doibt estre doulx & bening envers les bons, et user de l'esguillon, c'est à dire user de justice, envers les mauvais. Comment ilz signifioient la mort ou la fin de l'homme. Pour signifier la fin de l'homme ilz paignoient une fusee de fil et le bout du fillet rompu, comme s'il estoit separe de la quenoille, pource que les poetes faignent que les deesses fatales fillent la vie de l'homme, c'est assavoir Clotho tenant la quenoille, Lachesis qui signifie sort ou adventure, car notre vie est une aventure, laquelle fille, & Atropos interprete inconvertible ou qui ne se peult flechir, laquelle rompt le fillet. Comment ilz signifioient la vie. Pour signifier la vie ilz paignoient une lampe ardente pource que pendant que la lampe est allumee elle esclaire mais si elle est estaincte on est en tenebres, ainsi quant l'ame est partie de notre corps nous n'avons plus de veue ni de lumiere. Comment ilz signifioient labeur. Pour signifier labeur ilz paignoient une teste de beuf denue de chair, la teste de beuf pource que avec les beufz ont faict tout labourage, & denuee de chair pource que gens de labeur & qui souvent travaillent sont communement maigres. Comment ilz signifioient Dieu. Pour signifier dieu ilz paignoient ung œil pource que ainsi l'œil veoit & regarde ce qui est au devant de luy, dieu veoit, considere & congnoit toutes choses. Comment ilz signifioient les dieulx infernaulx qu'ilz appellent manes. Pour signifier les dieux infernaulx qu'ilz appelloient manes ilz paignoient ung visaige sans yeulx & au dessus deulx yeulx pource que par les yeulx ilz signifioient les dieux comme dict est & par le visaige sans yeulx ceulx qui sont en lieu bas & tenebreux. Imprime à Paris pour Jaques Kerver Jure En l'universite de Paris & fut acheve de imprimer Le xxiij. Jour de Novembre Mil cinq cens .xliij. |