Contrat de mariage entre Jean François Lebez et Margueritte Tourreille

11 novembre 1690

Du XI° jour du mois de 9bre 1690

Furent pnte[1] et comparurent en leurs personnes Jean Franchois Lebez jeusne fils acompagné de Jean son père, de Michel Lebez, Jacque et Noel Pruvost ses oncles et de Guillaume Leducq son parin demourant à Clary en Cambrésis d'une part, Margueritte Tourreille jeusne fille asistée de Anthoine et Mary Poret ses père et mère, de Michel Dominicq Legrand son beau-frère alliez, de Bernard Godriau son oncle et de Gérards Mutiau ausy son oncle demourant à S^t Souplet d'aultre part, et recognulrent d'eulx estre cejourdhuy assamblé pour contracter certain mariaige d'entre led^t Jean Franchois Lebez et icelle Margueritte Tourreille, lequel sy à Dieu plaict et que nostre mère la S^te Eglise y consente en icelle se solempnisera et en cas que ce pnt mariaige seroit acomply les devisses promesses et conditions s'ensuilt

Et premier

Pour ce quy est du bien et portement de mariaige dud^t Jean Franchois Lebez led^t Jean son père luy donne pour le premier port de sond^t mariaige deux estilles à usaige de meulquinier et les ustansils y servant avecq du fillée aud^t usaige pour faire deux toilles caisnes et traismes, plus a promis luy donner et payer la somme de cent florins monnoy dud^t Cambrésis à délivrer en deux termes sçavoir la moitié au jour de la bonne pasques, et l'aultre moitié pour l'accomplissem^nt de lad^te somme au jour de S^t Rémy ensuivant, le toutte en l'an que l'on dira mil six cent quattre vingt et onze

Item luy donne encoire cincq six mencaud de bled en natture prestement ce dit mariaige acomply,

Plus promet ausy de ne pas desroger sond^t fils de ce qu'il luy poldra appartenir après son décès et de celluy de sa femme en touttes et quelconcqs les biens immoeubles tant d'achapt que de patrimoine à eulx appartenant, ains debvra led^t Jean Franchois avoir fait part esgallem^nt à partir par ensamble avecq ses frères et soeures

Et quand à ce quy est du bien et portement de laditte Margueritte Tourreille, lesd^ts Anthoine et Mary Poret ses père et mère luy donnent la somme de deux cent florins monnoy dud^t Cambrésis à luy délivrer en plusieurs payements sçavoir cincq^te florins au jour de Noel prochain venant, item cincq^te florins au jour de S^t Jean-Baptiste ensuivant, item aultre cincq^te florins au jour de S^t Rémy ensuivant de l'an qu'on dira 1691 et aultre cincq^te florins pour l'accomplissem^nt de ladt^te somme au jour de Noel dud^t an 1691

Item donnent encoire à leurditte fille une mencaudée de terre lable[2] séant au terroir dud^t S^t Soupplet avecq les semis sur en bled y croissant et ce à tantmoins de sa part tenant d'une lisière à une mencaudée Jenne Legrand, d'aultre lisière aulx terres de S^te André et d'un bout à deux mencaudé du Sr Laude

Plus luy donnent encoire une vache à prendre en trois au chois desd^ts donnatteurs avecq ausy la somme de cincq patacons quy promettent ausy donner et payer à leurditte fille et ce au lieu de luy furnir son aminaigerie

Item donnent de plus à leurditte fille six mencauds de bled secq avecq promesse ausy de ne pas desroger de sa part les biens immoeubles quy luy peult appartenir après leurs deux décès, ains elle debvra avoir sa part esgallem^nt allencontre de ses aultres frères et soeures

Item que led^t Bernard Godriau a promis de labourer ou faire labourer pour et au proffict desd^ts futurs marians la mencaudée de terres cy dessus déclaré de toutte roy et saison, pour un bled et un mars lors qu'elle sera en estat de labourer après la despouille faict dud^t bled y croissant comme dit est

Item que led^t Michel Dominicq a promis ausy de donner ausd^ts futurs marians un mencaud de bled en natture

Item qu'il at esté devissé et acordé entre lesd^tes parties que le dernier vivant desd^ts futurs marians à hoirs et sans hoirs demourera en tous biens moeubles et action mobiliaire trouvé en leur comulnauté aulx charges des debtes, obsecqs et funérailles

A touttes les devisses, promeses et conditions cy dessus dittes lesd^tes parties respectivem^nt ont promis tenir, entretenir, furnir et acomplir de poinct en poinct sans y contrevenir par les fois et serment de leurs personnes soubz l'obliga^on de tous et chacun leurs biens pnts et futurs sur XXX pats[3] de paine à donner etc... renonchans etc... Faicte et passé aud^t S^t Soupplet pdevant[4] le notte[5] soubsigné et en pnce des parties et amis dénommée au préambul de cest le jour, mois et an que dessus. Tesm[6]

Bien entendue qu'il a encore esté promis par led^t Anthoine Tourreille et sad^te femme de donner et livrer ausd^ts futurs marians une demy thonne de petittes bière à chacun brassin qu'ils feront tant et sy avant qu'ils brasseront bierre, et sy laditte Margueritte leur fille viendroit à décéder paravant led^t Jean Franchois son future mary en ce cas ils ne seront plus par après obligez à furnir laditte demy thonne à chacun braissin à quoy ils se sont obligez sur la mesme paine et obliga^on que dessus

Jean François Lebez
+ marcq Margueritte Tourreille
+ marcq Jean Lebez
Paul Lebet
Michel Lebez
Jacque Pruvost
Guoilleiaumme Le Ducq
Anthoine Thoural
Marie Poret
+ marcq Michel Dominicq Legrand
Bernard Gaudreau
Gérard Muteau
Boursiez, 1690, greffier, notte

Et du depuis sçavoir le III° may 1695

comparant au greffe, Jean Franchois Lebez soubsigné, lequel a déclaré et confessé d'avoir receu d'Antoine Tourreille son beau-perre tout ce qu'il avoit promis à Margueritte Toureille sa fille porté en ce pnt mariaige tant en argent que aultrem^nt, dont il le tient quitte et sa femme à tousiours, et d'ailleur led^t soubsigné avecq sa femme après avoir jouy quelque temps de la mencaudé de terres cy dessus donné à lad^te Margueritte Tourreille au proffict de laquelle il n'en avoit esté faict aulcun debvoir de loy suivant lad^te donnation ils se seroient trouvé conseillé pour leur plus grand proffict de la rendre et vendre ausd^ts Anthoine Tourreille et sa femme le pris de vingt patacons monnoy de Flandre pris convenu entre eulx que led^t soubsigné a receu dud^t Anthoine Tourreille et sad^te femme de quoy il s'en est ausy tenus pour comptens et bien payer, laquel vente il a promis de la garandir sans en faire aultre debvoirs de loy puis qu'il n'en avoit esté faict suivant lad^te donnation, c'est à dire qu'elle tiendra mesme natture icelle mencaudé comme paravant led^t contract de mariaige pour en jouir par led^t Anthoine Tourreille et sa femme à tousiours. Ainsy faicte acquittée et vendue le jour, mois et an que dessus en pnce du greffier soubsigné et Simon Lebez mayeur de Buzegny tesm à ce evocqué

Et à l'instant led^t Jean Franchois Lebez at pareillem^nt receu de Jean Lebez son père tout ce quy luy avoit ausy promis par led^t contract en foy de quoy à signé en aproba^on de verité

Jean François Lebez
Boursiez, 1695, greffier

Ecrit au dos
Mariaige de Jean Franchois Lebez et Margueritte Tourrrreille de St Souplet, 1690

(Source: AD59, Tabellion de Cambrai: 2 E 26 / 96, transcription Marc Maillot)