2E26-096 CM Parent/Millot

Furent pnts[1] et comparurent en leurs personnes Piere Quentin Parent jeusne fils acompagné de Jean Parent et Mary Henninot ses père et mère, de Paul Parent son frère, Jean et Pierre Henninot ses oncles et Pierre Gabet son cousin, demts[2] à Clary d'une part, Margueritte Millot jeusne fille asisté de Toussainct Millot et Marie Bricoult ses père et mère, de Piere Deudon et Michel Gransart ses beau-frères alliez et Jean Bricoult son oncle demts aud^t Clary d'aultre part, et recognulrent d'eulx estre cejourdhuy assamblé pour contracter certain mariaige d'entre led^t Piere Quentin Parent et icelle Margueritte Millot, lequel sy à Dieu plaict et que nostre mère la S^te Eglise y consente en icelle se parfaira et solempnisera, et en cas que ce pnt mariaige seroit acomply les devisses promesses et conditions s'ensuilt

Pour ce quy est du bien et portement de mariaige dud^t Piere Quentin Parent il at à luy appartenant une rasière de terres lables[3] en deux piesches au terroir dud^t Clary venant de donation à luy faict par feu Jonas Boursiez et Mary Leducq sa mère-grande, sicomme trois boist[4] vers le Ruyot Croixant ten^nt à quinze mcd[5] du S^r du Sartel et à une mencaudé Mary et Mary Jenne Henninot, et les aultres trois boistelée vers le Mais Pas tenant à trois boist Jean Pruvost et à trois boist Anthoine Millot

Item qu'il at encoire deux estilles à usaige de meulquinier avecq les ustansils y servant et chargé de fillée pour faire plusieurs toilles

Et quand à ce quy est du bien et portement de lad^te Margueritte Millot lesd^ts Toussainct Millot et Mary Bricoult sesd^ts père et mère luy donnent en advanchem^nt de sond^t mariaige et à tantmoins de sa part toutte une rasière de terres à usaige de thieullery prinse indivisamm^nt en trois mencaudé séant aud^t Clary tenant en lisière au jardin Nicaise Moustier, d'aultre à l'aultre moitié restant et pardevant à la grand rue des thieullery, à condition d'avoir aultant d'issue tant pardevant que derière que l'aultre rasière restant, sur laquelle rasière de terres lesd^ts donatteurs ont promis d'y faire ériger un carpentaige de bois pour faire maison et chambre contenant trentte deux pieds avecq les cheuvrons convenable, le toutte à leurs frais et despens à bref jours, et trois milles de thuilles pour en partie furnir la couverture dud^t carpentaige, et come il y at un certain bastiment nommé un halliez pntem^nt érigé sur lad^te rasière de terre, lequel lesd^ts donatteurs ont réservé pour demourer là tant que bon leur semblera pour estre à eulx propre et s'en servir ainsy qu'ils trouveront convenir sans aulcun empeschem^nt desd^ts futurs marians

Plus ont promis de donner à leurditte fille la somme de cent florins monnoy de Flandre à luy délivrer sitost ce mariaige acomply, avecq deux bleds et deux mars d'une mencaudé de terres derière la Sottière tenus à ferme de Monsr de Ranfreville au rendaige de bled ten^nt à pareil mcd[6] du notte[7] soubsigné et cincq mencs fief Nicolas Gransart, laquelle mencaudée lesd^ts donatteurs ont promis labourer tant à saison que mars pour et au proffict desd^ts futurs marians et pour par eulx y prendre et faire lesd^tes despouilles deux bleds et deux mars, dont la première se fera à bled à l'aoust prochain venant, à condition que lesd^ts futurs marians payeront le rendaige aud^t S^r de Ranfreville telle que led^t Millot paye pour les aultres mesmes terres

Item donnent encoire à leurditte fille une omail[8] et quattre mc[9] de bled secq, avecq promesse de l'aminaiger de plusieurs piesches, sicomme une seil, une tinette, un mineau, un pot feu à feu, une puel, une cramelly, une couverte de laisne, deux paires de lynceulx et aultres furniture du lict et menuttes piesches de mainaigeries

Item que lesd^ts futurs marians ont réciprocquem^nt faict et assigné douaire à l'un l'aultre sçavoir led^t Pierre Quentin at assigné à laditte Margueritte Millot toutte laditte rasière de terres cy dessus déclaré, et lad^te Margueritte Millot at assigné en réciprocq aud^t Piere Quentin Parent toutte lad^te rasière de jardin ausy dessus déclaré, pour par eulx en jouir respectivem^nt à hoirs et sans hoirs leur vie durant seullem^nt en observant la coustume de ce pays de Cambrésis, à condition d'en passer les debvoirs de loy avant espouzer

Item qu'il at esté devissé et acordé entre lesd^tes parties que advenant l'un ou l'aultre desd^ts futurs marians viendroit à décéder sans délaisser hoirs du pnt mariaige les amis et plus prochain parent du décédé seront libre de reprendre franchem^nt les trois principal piesches dabillement qu'elles auront servie à son chef et corps sans aulcune charge des debtes, obsecq ny funéraille

Et hormis le cas susd^t le dernier vivant desd^ts futurs marians à hoirs et sans hoirs demoura en tous bien moeubles et action mobiliaire trouvé en leur comulnauté aulx charges des debtes, obsecq et funéraille,

Item que led^t Jean Parent et Marie Henninot sad^te feme ont promis de laisser ou faire valloir aud^t Piere Quentin leur fils sa part esgallem^nt allencontre de ses aultres frères et soeures, en tous les terres lables qu'ils ont et délaisseront après leur trespas, tant à celles du terroir dud^t Clary que sur celluy de Montegny sans en déroger aulcune chose

A touttes les devisses et conditions cy après dittes lesd^tes parties respectivem^nt ont promis tenir, entretenir, furnir et acomplir de poinct en poinct sans y contrevenir par les fois et serm^nt de leurs personnes soubs l'obliga^on de leurs biens pnt et futurs, sur XXX pats[10] de paine à donner etc... renonchant etc... Faict et passé aud^t Clary pdevant[11] le notte soubsigné et en pnce des parens et amis dénommé au préambul de cest le jour, mois et an que dessus. Tesm[12]

Bien entendue qu'il at esté convenue et acordé entre lesd^tes parties que led^t Jean Parent et sa feme se sont réservé de dispozer à leur vollonté de tous leurs terres lables et par ainsy ils en pourront exclure led^t Piere Quentin leur fils de quelques partie sy bon leur semble

Pierre Quentin Parent
Jean Parent
Marguerit Millote
Mari Henninot
Paul Parent
Jean Henni
Pierre Hennino
Pierre Gabez
Piere Deudon
Toussain Meillot
(Illisible)
+ marcq Marie Bricoult
+ marcq JeanBricoult
Boursiez, 1691, greffier, nott

Ecrit au dos
Mariaige de Piere Quentin Parent et Margueritte Millot à Clary, 1691

[1] Pour « présents ».
[2] Pour « demeurant ».
[3] Pour « labourables ».
[4] Pour « boistellées ».
[5] Pour « mencaudées ».
[6] Pour « mencaudée ».
[7] Pour « notaire ».
[8] Une jeune bête à corne.
[9] Pour « mencauds ».
[10] Pour « patards ».
[11] Pour « pardevant ».
[12] Pour « témoins »